Өзбекәлі Жәнібеков атындағы Оңтүстік Қазақстан педагогикалық университетінде техника ғылымдарының кандидаты, доцент Абдулла Әріпов атындағы арнайы дәрісхана ашылды. Абдулла Әлімбайұлы — 1956 жылы академик Қаныш Сәтбаевтың ұсынысымен Шымкент қаласына отбасымен көшіп келіп, Шымкент педагогикалық институтының «Физика» кафедрасын он алты жыл басқарған.
Салтанатты шарада дәрісхананың лентасы қиылып, алғашқы құттықтау сөз университет Басқарма төрағасы-ректор міндетін атқарушы Гүлжан Сүгірбаеваға берілді.
Гүлжан Дәулетбекқызы саналы ғұмырын ұрпақ тәрбиесі мен білім жолына арнаған Абдулла Әлімбайұлы туралы естеліктерін толғай келе, жаңа дәрісхана білім алушылардың сапалы білім алуына, ғылыми ізденістер мен жаңа идеяларды іске асыруға септігін тигізетініне сенім білдірді.
Тағылымды шараға арнайы келген құрметті қонақ, ҚР Парламенті Сенатының депутаты Ғалиасқар Сарыбаев шараның маңызына мән беріп, өткен айда қабылданған ғылым мен жоғары білімді дамытуға арналған жаңа заң туралы айтты. Халық қалаулысы жаңа нормалар ғалымның мәртебесін көтеруге, ғылыми қызметкерлерді ынталандыруға және талантты жастарды ғылыми қызметке тартуға бағытталып отырғанын тілге тиек етті.
Ал, Абдулла Әріптің қызы, медицина ғылымдарының докторы, Абай атындағы ҚазҰПУ «Арнайы педагогика» кафедрасының профессоры Айсұлу Тайжан қамқор әке, жанашыр жан туралы балалық естеліктерін бөлісті.
Іс-шарадан кейін қонақтар университет ғимаратын аралап, бүгінгі тынысымен танысты.