Өзбекәлі Жәнібеков атындағы Оңтүстік Қазақстан педагогикалық университетінде Шымкент қаласындағы қуыршақ және жасөспірімдер театры «Қартқожа» деректі драмасын сахналады.
Жүсіпбек Аймауытовтың 135 жылдығына арналған сахналық қойылымды университет басшылық құрамы мен оқытушылар, студенттер қызыға тамашалады.
Режиссер Исмайл Жарастың сахналауымен ұсынылған тартысты трагедия белгілі жазушының шығармасы негізінде өткен ғасырдың басындағы аласапыран жылдарды бейнелейді. Кедейшілік қыспағы мен патша өкіметі салған лаң, соғыстан көз ашпаған бозбаланың кеудесінде білімге деген құштарлық оты сөнбейді. Бір әулеттің жүгін арқалап ерте жетім қалған жас бәрібір арманына адалдық танытып, оқысам деген ниетіне жетеді.
Басты рөлді сомдаған Н. Таңатар, сондай-ақ, қосалқы рөлдердегі Е. Әйтенов, Н. Жұмабай, Ф. Әбіл, Ш. Бейсенов, Қ. Асанов, С. Биғабылов, А.Әбдіжамал, Ш. Зеберхан, тағы басқа әртістер көрерменді өз ойынына сендіре білді. Ал, театр директоры Самат Алтайдың «Көрермен театрға келмейді деп отыра бермей, театр көрерменді өзі іздеп келетін әрекетті де жасауымыз керек» деген уәжі қисынды.
Қойылымнан кейін Өзбекәлі Жәнібеков атындағы ОҚПУ Басқарма төрағасы-ректор міндетін уақытша атқарушы Гүлжан Сүгірбаева театр ұжымына алғыс білдірді.
— Жақында ғана Жүсіпбек Аймауытов атындағы колледжді ашқан университетімізге жазушы шығармасын насихаттай келгендеріңіз үшін рақмет, әріптестік ынтымағымыз жалғаса берсін, - деген Гүлжан Дәулетбекқызы ұжым атынан ықылас гүлі мен Өзбекәлі Жәнібеков портреті бейнеленген гоболенді сыйға тартты.